Lapan Thôn Lheuh Tsunami

<<download pdf>>  <<batja pdf>>
Siaran Pers
26 Désèmbèr 2012

Lapan Thôn Lheuh Tsunami

Asssalamu'alaikum wr.wb.

Bismillaahir Rahmaanir Rahiim...

”Walanabluwan nakum bisjai-in minal khaufi wal djuu'i, wanaqshim minal amwaali wal-anfusi wats-tsamaraat. Wabasj-sjirish-shaabiriin. Alladhiina idhaa ashaabathum mushiibatun, qaaluu: Innaa lillaahi wainnaa ilaihi raadji'uun. Ulaa ika 'alahim shalawaatun min rabbihim wa rahmah. Wa ulaa ika humul muhtaduun.” (Al-Baqarah: 155-157)

Uroënjoë 26 Désèmbèr 2012, geunap lapan thôn musibah geumpa dan tsunami njang ka peuhantjô peuë-peuë njang na di nanggroë Atjèh; saboh malapeutaka njang paléng rajek njang ka peuguntjang dônja dan peuhantjô haté geutanjoë njang mantong hudép uroënjoë. Musibah geumpa dan tsunami njoë kadjeuët keu saboh tragedi nasional keu bansa Atjèh. Dalam padum-padum minet sagai meurutôh ribèë bansa teuh: inong-agam, thjik-putik, tuha-muda, kaja-gasiën ka djiba lé ië raja, meusigo deungon bandum hareuta boinahneuh: rumoh, muto dan laén-laénl lom. Allaahu akbar, Allaahu Akbar, Allaahu Akbar walillaahil Hamd...


Pidatô Ulang Thôn AM keu 36 Uléh Dr. Husaini Hasan


Pidatô Ulang Thôn Atjèh Meurdèhka Keu 36 (4 Désémbèr 2012)
Uléh: Dr. Husaini Hasan 

Bismillahirrahmanirahim

Assalamu'alaykum,

Innal hamda lillah, nahmaduhu wanasta'inuhu, wanastaghfiruhu, wana'uzubillahi min sjururi anfusina, wasayyi-aati a'maalina; mayyahdillaahi falaa mudhillalah. Wamayyadhlill falaa haadiyalah. Wa asyhadu Anna Muhammadan 'abduhu warasuuluh. Taslimang katsiira. Amma ba'd:

Njang ulôntuan pemulia Ureuëng-Ureuëng tjhik ulôntuan, Tengku-Tengku Gurèë ulôntuan. Njang ulôntuan hôreumat, tokoh-tokoh masyarakat Atjèh, rakan2 seutia, pat mantong geuduëk ateuëh rhuëng dônja.

Njang ulôntuan gasèh dan sajang aneuk-aneuk ulôn, tjutjo-tjutjo ulôntuan, aneuk-aneuk muda Atjèh harapan geutanjoë keu generasi bangsa Atjèh masa ukeuë.

Topik pidato ulôntuan thôn njoe nakeuh: "seumiké meurdéka, hudép meu-adab, maté mulia" 
 
Ureuëng geutanjoë Atjèh sampoë uroë njoë mantong dalam bingong! Mantong dalam ”identity crisis”. Keuadaan di Atjèh uroë njoë mantong hana mubida deungon keuadaan Atjèh bak masa 1976. Ureuëng Atjèh djinoë mantong mangat that teungeut deungon nina bobok Indonesia. Hana muphôm bahwa geutanjoë Atjèh sampoë saat njoë goh lom Meurdèka.

Geutanjoë bangsa Atjèh kon bangsa Indonesia. Agama geutanjoë Islam, bangsa geutanjoë Atjèh. Allah ka neupeudjeuët manusia mubangsa-bangsa. Ho njang tadjak peureulèë na identitet (ID), KTP, Passport. Bandum bangsa djipiké keupeunténgan bangsa droë djih. Meunantjhit deungon geutanjoë Atjèh keupeunténgan bangsa geutanjoë nakeuh leummôi sa dalam dônja. Njoë ka ulôn peugah meu-ulang-ulang, dalam pidato-pidato ulôntuan njang ka ka.

Pham keumeurdèkaan dan kebangsaan njoë peuntèng that sabé beu-na lam ulèë masjarakat Atjèh, terutama that keu ureuëng Atjèh di nanggroë Atjèh meusabab deungon ureuëng geutanjoë di nanggroë ka biasa geuseumiké sibagoë bangsá Indonesia. Titék-tulak atawa dasar seumiké rakan-rakan di nanggroë berdasarkan Atjèh sibagoë bangsa Indonesia; sehingga dumpeuë-dumpeuë hana lheuëh nibak bingkai NKRI.

Seumiké meurdéka atawa meurdèka bak tjara seumiké njan peunténg that! Pakriban tjara geutanjoë beudjeuët tadong keudroëteuh dalam dumpeuë peukara. a.l.: dalam bideuëng ekonomi, budaja, politik dan militer. Pakon ureuëng Atjèh djinoë han keumah geupiké beukeumah dong keudroë dalam kebutuhan-kebutuhan primer (pokok) droëgeuh. Breuëh, eungkôt, gulè, manok, boh manok, susu, saka, ië djéb. Barang-barang njan bandum beukeumah peuna keudroë!. Bèk meugantung dari Medan atau dari luwa Atjèh. Sardjana-sardjana pertanian, peternakan, teknik, biotehnik ka tjukop ramè di Atjèh pakon hana geupeugot sapeuë? 

Eleumèë dan pengalaman njang ka geudjak meurunoe uluwa nanggroe njan pakon hana geupeuguna di Atjèh? Nanggroë Atjèh neuteukeudi le Po Nanggroë. Agrikulture, tjukôp subur dan le kruëng; tjukôp ië hudjeuën, hana saldju, ban sipanjang thôn djeuët tangui kon lagèë di Ierupa hanya 4-6 buleuën sagai njang djeuët geu-seumula; meutapi kebutuhan pokok awak njan keumah djipeuna keudroe djih. Kalon nanggroe Denmark! Nanggroe nr. 2 makmu dalam dônja, nanggroë njan leubèh ubit dari geutanjoë, leubèh nit kruëng djih, tapi manok djih, susu djih, kedju djih keumah dji-expor u luwa, u Ierupa, troh u Africa dan Middle East. 

Nanggroë Belanda ubé plôk kèh teubandéng deungon nanggroë Atjèh. Djipula boh timon, boh tomat, bungong tulip dan sajô dalam rumoh katja (green house), le that biaja untuk peusuuem, meutapi, beuthat pih biaja pengelolaan djih leubeh meuhai, keumah dji-export boh timon dan boh tomat djih ban saboh Ierupa. Boh pukat geutanjoë, pisang geutanjoë, breuëh tangsé geutanjoë nakeuh qualitet njang paléng got dalam dônja. Tapi dônja hana djiteupeuë, hana djituri, sabab hana tatu’oh promosi. bandum brôk djijub bak, teuboih-boïh keudroë hana soë padjôë atawa ka djingui djibôh nan gob. Produksi geutanjoë, tapi nan gob; awak njan njang tjok laba. 

Ka ulôn peugah dalam pidato lôn njang kalheuëh, untuk tabangun tenaga listrék dan djalan raja (highway), geuritán apui. Teunaga listrék geutanjoë djeuët tabangun dari teunaga surja, atawa microhydro njan sumber geutanjoë tjukôp le. Dinanggroë madju Ieurupa dan USA, dan Djeupang, atawa njang teungoh madju, lagee China, Korea Selatan hana sapeue teuboih. Trôh bak brôih djeuët dji-olah keulai, djeuët djingui lom djipeugot keu sumber energi, kertaih-kertaih brôih djipeugot keulai djeuët keu kertaih toalett, buku dll (recycle djikheun). Katja beukaih djeuët djipeugot keu aleuë, lagèë marmar. Geutanjoë marmar hidjô na di glé geutanjoë muploh go leubèh meuhai hana ta tu'oh ngui. Djigob dhôi kajèë, èk njoh, djipeugot keu papeuën, djipeugot keu pintô, keu prabot bandum djingui, hana teuboih. Djigeutanjoë, bak mereureubo, djatoë, seumantôk, meuranté, kruwéng, taboih-boih tapubloe murah. 

Beutôi lagèë Almarhum Wali peugah, ureuëng Atjèh ka maté saraf, "enervated savages" ka hana tu'oh lé seumiké. Kadjeuët keu awak padjôh pisang teupuliek, siumpama padjôh pisang, trôh bak puliëk pajah beu-gob puliëk, hana tu'oh dan han keumah puliëk lé keudroë. Meunan umpama ka ureuëng Atjèh djinoë. Phôn that meurdèhka njan nakeuh meurdèhka bak tjara seumiké. Le that tjara berdjuang untuk meurdèka, meungnjo tatém, njang paloë djih hana inisiativ sapeuë. Sang meurdéka njan rhet dari langèt. Dumpeuë prèh dahoh dari Medan, djak meulakèë keudéh u Djawa. Hana malèë lé djak meudahoh, djak theun paleuët bak gob. Bahan baku meusipak di Atjèh njang djeuët ta olah keudroë, tapi inisiativ hana? Sardjana Atjèh djnoë ka meuribee, tapi hana meungui, ka meugeuratan keudroë 'eleumèë njang ka geudjak meureunoë. 

Kemadjuan dônja uroë njoë ka beralih keunoë u timu. Meungnjo 30 thôn njang kalheuh ureuëng geukalon u barat, djinoë ka meutuka, ureuëng ka geukalon u Timu. Investment djinoë ka le u Timu. Pabrék, industri, le njang ka djitôp di Barat Dan teknologi njan ka dji-ba u Timu. U Tjina, India, South Korea, dan Asia Tuengara.

Djadi djinoë kesempatan geutanjoë Atjèh untuk ta ikôt rentak perkembangan dônja. Geutanjoë Atjèh nakeuh pintu gerbang u Timu djeu-ôh njoë. Sipatôt djih geutanjoë Atjèh dilèë njang puphôn perkembangan dan kemadjuan di Asia Tuëngara. Tapi geutanjoë lalè, hana tu’oh ngui kesempatan masa njan. Gadôh meuklok-klok saré keudroë-droë. Gadôh ngui system tjatok brôk, rhôn ukeuë droë maséng-maséng. Hana piké keu ureuëng gasiën, keu inong balèë dan keu aneuk jatim. Hana tu’oh ngui system kooperasi, kemakmuran dan kesejahteraan bersama. Padahai nanggroë Atjèh tjukôp kaja deungon bahan baku dan natural resources. Sép untuk tapeukaja bandum ureuëng Atjèh meusigo dan tapeumakmu Atjèh sama-sama. Njang peunténg ta atô droe teuh, pakriban tapeugot system nanggroë beu-adé dan meurata. 

Nanggroë njang rajek bida ureuëng kaja dan gasiën njan han stabil, karu sabé. Rakjat njang gasiën njan pasti akan djiberontak, sooner or later. Ureuëng han keumah tapeungeut sabé-sabé. Akibat brôk dari hasé seumeungeut njan akan meubalék keu ureueng njang seumeungeut njan keudroë. Njan kalheuëh ta eu dalam sidjarah peumpimpin-peumimpin dhalém lam dônja.

 Keu Peukara Wali Nanggroë njang djeuët keu pembitjaraan hangat di Atjèh djinoë ulôntuan tanggapi batjut. Sibeutôidjih meusangkôt keu peukara tapilih peumimpin di Atjèh njang peunténg system peumilihan djih. Memang hana system njang sempurna, adil dan bidjaksana. 

Bandum system na kureuëng ketjuali system njang neupeutren dari langet njakni system njang ka geupeutunjok lé nabiullah Muhammad saw. Njang karab toë keunan mungkén system demokrasi, tjara peumilihan langsông dari rakjat deungon geupiléh perwakilan droëgeuh maséng-maséng. Tapi meungnjo system pelaksanaan djih na intimidasi, antjaman, paksaan, rajuan atau sogok dan sibagoë njan maka system demokrasi lagèë njan pih ka hana beutôi lé tjit. 

System monarki pih le kureueng tjit. Peuë pasai Radja djeuët geutunjok soë djeuët keu geunantoë gobnjan kri njang meuheut geuh kon meudasar deungon keu-ahlian dan keubidjaksanaan ureuëng njan. System monarki njoë ka rab bandum djiteuntang lam dônja. Djadi dalam hai peumilihan Wali Nanggroë, Peumimpin njang paléng manjang dalam masjarakat Atjèh njang akan peuteuntèë hudép maté bangsa Atjèh dan Neugara Atjèh peunténg beu-na system njang beutôi meungnjo han maka geutanjoë Atjèh akan ta rasa lom bala njang paléng rajek lom ukeuë. 

Na’uzubillah. Keu hai njoë bandum djeuët keu tanggông djaweuëb geutanjoë bandum ureuëng Atjèh. Kon disidéh di Jakarta. Sabab geutanjoë Atjèh njang akan tanggông hasé brôk atawa effek brôk akibat nibak meungnjo salah tapiléh peumimpin. Uléh sabab njan ureueng Atjèh keudroe handjeuët geu-iëm droëgeuh soë peumimpin njang galak geu-grak untuk pimpin droëgeuh. 

Meungnjo ta iëm droëteuh mumakna geutanjoë galak teuh dan ka ta seutudju. Ulôntuan harap masjarakat Atjèh mantong na seumangat untuk peuteuntèë nasib droë-keudroëgeuh dan hana passiv teurimong mantong peuë njang geupeuseu-ôn ateuëh ulèë geuh atawa hana hah babah mantong peuë njang geusuleuëng dari ateuëh.

Wabillahi taufiq wal hidajah,

Wassalam,


Dr Husaini Hasan








Pidato Milad ASNLF Sagoë Sweden



Pidato Milad 4 Dèsémbèr 2012
ASNLF Sagoë Sweden
Ulèh: Tgk Syahbuddin Abdurrauf





Assalamu’alaikum Wr Wb,


Bismillahirrahmanirrahhim,


Faman tabi’ahudaa ja fala khaufun ’alaihim walaahum jakhzanuun. Albaqarah- 38.”Soë njang seutot peutunjok Kamoë, maka hanapeuë njang geutakôt dan hana peuë njang geu-sôsah” – Al-Quran, Surat Al-Baqarah: 38.


Uroë njoë, 4 Désèmbèr, 2012, geutanjoë ta peu-ingat 36 thôn Atjèh Meurdéhka. Njang ka peusambông seudjarah geutanjoe deungon meureutôih thôn njang ka ulikôt sibagoë saboh bansa njang meurdéhka dan meudèlat dalam dônja.


Dalam peu-ingat Uroë 4 Désèmbèr 2011 thôn njang ka ulikôt geutanjoe ka ta lakèë bak bandum bansa Atjèh ban saboh dônja geumeudo’a, mudah2an thôn 2012 buët peumeurdéhka bansa beumeutamah madju dan bandéra Atjèh beuleubèh lom le dji-ék nibak thôn2 njang ka ulikôt.


Deungon do’a dan ôseuha geutanjoe bandum, uroë njoe kadeuh ta kalon deungon mata ulèë teuh bahwa bansa Atjèh ban saboh dônja dan di nanggroe ka geubeudoh lom dan bandéra Atjèh ka dji-ék keulai ban saboh njan. Geutanjoe bansa Atjèh di Sweden mantong teu-ingat teuh, lheuëh djitèkèn MoU di Helsinki, padum thôn sabé Bandéra Atjèh njang na meuprèk-prèk tjit meu di Sweden sagai.



Lom lagèë njang kalheuëh geutanjoë meutjeukot tjit dalam Uroë 4 Désèmbèr 2011: Na sibagian nibak geutanjoë njang gohlom muphôm, pakon pajah tapeu-ingat Uroë 4 Désèmbèr njoe tiëp2 thôn? Tapeu-ingat mangat teu-ingat! Supaja bèk tuwoteuh keu rakan2 dan sjèdara geutanjoë mandum njang ka geusjahid bak geupeutheun marwah dan bandéra meutuah njoe. Disampéng nibaknjan, tepeu-ingat Uroë 4 Désèmbèr njoe tapeu-ingat droëteuh-tjit. Pakon geutanjoe na disinoe uroë njoe. Pakon geutanjoe ka teugeuntit saboh saho, u Norway, Denmark, Amirika, Kanada, Australia, Beulanda dan ho2 laén lom.


Njoekeuh seubab, pakon musti tapeugot Uroë 4 Désèmbèr njoe. Meunjo hana tapeugot ka tuwoteuh. Njang leubèh peunténg lom, tapeu-ingat Uroë 4 Désèmbèr njoe keu aneuk geutanjoe njang muda2. Meunjo geutanjoe ureuëng po buët njang teulibat langsông dari phôn kon hana tapeugot maka hana peuë taharap aneuk2 geutanjoe akan djipeugot ukeuë. Njoe peunténg that, sabab njoe peukara identitas bansa atjèh. Peukara geutanjoe takeumeung hudép sibagoë saboh bansa. Njang geutanjoe na bansa droë teuh – bansa atjèh.  Peukara geutanjoe na nanggroë droë teuh – nanggroë atjèh; na bandéra droë teuh – bandéra atjèh dan na uroë rajek droë teuh. Njoë peunténg that, pajah ta-ingat sabé! Meunjo geutanjoe hana takeumeung ngiëng aneuk2 geutanjoe hudép meu-seuët2 lagèë geutanjoe tjit.




Kru-Seumangat! (3x).  Patôt tameusjukô ubak Po-Teuh bahwa beureukat geutanjoe ta tém meudong padum2 droë disinoe, uroë njoe geutanjoe kon sidroë teuh lé. Bansa Atjèh ban saboh dônja mulai dari Kanada sampoë u Australia ka sadjan geutanjoe. Meunantjit di nanggroë, bah that pih handjeuët geupeudeuh droë geuh, tapi geutanjoe teupeuë bahwa bansa Atjèh djeuëb2 wilajah ka na hubôngan dan ka na lom sadjan geutanjoe. Allah ka neumeudjandji dalam firman Neuh: Qul djaa al haqqu wazahakal baathil, innal baathilaka na zahuuqa. Takheun, ka teuka njang beuna dan ka hantjô njang bateuë. Njang bateuë njan ka pasti hantjô. (surat al-Isra176).


Saboh peuristiwa njang paléng tjeudaih njang teudjadi dalam thôn njoe nakeuh: peukara bansa Atjèh keumah geumeusapat lhèë uroë di Denmark bak uroe 6-8 April, dan ka keumah geutjok peunutôih geupeuhudép keulai Atjèh Meurdéhka dan geusambông keulai peurdjuangan éndatu.  Dalam watèë njang paneuk njan, neuduëk Atjèh dalam dônja ka keumah geupeugisa lom bak neuduëk asai, bak neuduëk njang neutinggai uléh PNM Wali Neugara jôh gohlom droëneuh sakét dan jôh gohlom djikudéta uléh awak njang ka publoë nanggroë keu peundjadjah RI uroë njoe.


Dalam watèë padum2 buleuën njoe, Bandéra Atjèh meurdéhka ka padum2 go keumah tapeu-ék bak markas2 UNPO di nanggroë Beulanda dan PBB di Djeunewa.


Dalam padum2 uroë njang ka ulikôt lhèë droë peumimpin Atjèh Meurdéhka na di Genèva ateuëh undangan Sidang Umum dan Rapat Presidum UNPO, disinan delegasi Atjèh Meurdéhka djeuët seutot bandum (100%) keugiatan UNPO bahthatpih seutjara administrasi geutanjoe gohlom rasmi djeuët keu anggèëta. Lapôran leungkap keugiatan seulama peuët uroë di Djeunewa akan na dalam lapôran njang teupisah. Njoe saboh keumadjuan njang luwa biasa keu geurakan geutanjoe njang ban that mantong tabeudoh.


Disampéng haba mangat njang ka geutanjoe deungo, le tjit haba2 seudéh njang ka teudjadi di nanggroë dalam thôn njoe.




Njang phôn, dalam peumilu untôk meureubôt-reubôt pangkat dan kuasa di nanggroë bak buleuën April, le that teudjadi kekerasan, antjaman, seuhingga teudjadi buët2 seumupoh njang sibutôidjih hana peureulèë teudjadi tapi ka djipeulaku uléh pihak2 njang djirasa droë gohlom meurumpok sapeuë dari hasé publoë nanggroë keu si pa-i.


Njang keudua, na sidroë ureuëng njang hana meutatupat asai pih, teuka u Atjèh padum2 thôn ulikôt, djinoe keuneuk peudjeuët droë keu radja, deungon tjara peutjah’èt droë atawa labô- darah sutji famili Tgk Thjik di Tiro bak badjèë, untôk peungeut ureuëng Atjèh njang bangai2 njang ka keumah djibloë uléh ureuëng aséng njan.


Njang keulhèë nakeuh bandéra Atjèh Meurdéhka. Peureuté Atjèh Bangai (PAB) njang ka keumah djipeuwië-uneun uléh bansa aséng dari Singapura njan, keuneuk djak ngui bandéra sutji Atjèh Meurdéhka njan untôk keupeunténgan keulompok PAB dan untôk aléh peurhatian rakjat njang teungoh geupeu-sueuë peukara Leumbaga Wali Nanggroë njang han keumah geuteurimong sagai2.


Peukara lhèë boh keudjadian diateuëh njan, keu geutanjoe Atjèh Meurdéhka hana hireuën teuh lé.  Meunjo sidroë Wali Neugara, Tgk Thjik di Tiro Mohammad Hasan, keumah djipubloë keu sipa-i, djipeutamong warga neugara RI, watèë droëneuh njan si-at treuk keumeung habéh umu, meubatjut pih tan pajah keu PAB njan untôk djirampaih tahta atawa neuduëk Tgk Thjik di Tiro njang mulia njan. Njoe bandum keumah djipeulaku kareuna ureuëng Atjèh uroë njoe hana geutu’ôh lé peumulia droë, hana geuteupeuë lé toh njang butôi dan toh njang salah. Dumpeuë djeuët djipeulaku asai bèk karu2 mantong – njan ban sibagian ureuëng Atjèh seumiké uroë njoe.



Meunankeuh narit geutanjoë bak Uroë, 4 Désèmbèr, 2012, diantara njang peureulèë tamarit bak uroë njang meuseudjarah njoe. Geutanjoe wadjéb sabé takheun: ”Njoëkeuh keubeunaran nibak Poteuh Allah. Soë njang tém supaja djipeutjaja, soë njang hantém bah keuh djikuphô”


”Waqulil Haqqu Mirrabbikum, Famansjaa faljukmin wamannsjaa faljakfur” – Alkahfi 29

Allahummahummaghfirlana waliwa lidaina walidjami’il muslimina muslimat al-akhya himilamwat

Allahumma thahhir qulubana minan nifaq
Ja Tuhanku neupeugléh até kamoë nibak munafèk

Wa’amalana minal rija
Neupeudjiôh buët kamoë nibak riya

Walisanana minal kizbi
Dan neupeugléh lidah kamoë nibak meusulét

Wa’ainana minal khianah
Dan neupeudjiôh mata kamoë nibak khianat

Innama ta’lamu khianatan ’akjuun
Dan Droëneuh neuteupuë mata2 njang khianat

Wama takhfassuduur
Dan neuteupeuë peuë njang teusom lam até

Allahumma inna nashaluka nafsan muthmaithnatan jukminn billiqa-iq
Ja Tuhanku meulakèë bak Droëneuh njwong njang ka seunang meurumpok
deungon Droëneuh

Wataqna’u bi’athaa-iq
Dan ka seunang deungon peuë njang Droënuh bri

Wataqdha bi qadha iq
Dan njang ka redha deungon peuë njang ka neuredha uléh Droëneuh

Allahumma anta ta’lamu sirrina
Dan Droëneuh neuteupeuë rahsia kamoë

Wa’ala niatina
Dan peuë njang kamoë hana som-som

Faqbal ma’dhiatina
Maka Neuteurimongkeuh meulakèë kamoë

Wata’lamu hadjaatuna
Dan Neuteupeuë hadjat kamoë

Fakbal su-aa-lana
Maka neubrikeuh peuë njang kamoë lakèë

Amin Ja mudjibus sailiinn. Birakhmatika Ja Arhamarrahiminn.  

AL-FATIHAH..!!

Amanat Keutuha Presidium ASNLF





Amanat Keutuha Presidium ASNLF
bak uroë ulang thôn Atjèh Meurdéhka keu 36

Bismillahirrahmanirrahim

Assalammu’alaikum w.w.

Njang ulôn peumulia bandum bansa Atjèh ateuëh rhuëng dônja njoë.

Alhamdulillah pudjoë keu Po Teuh Allah SWT, njang ka neubri nikmat hudép, langkah dan raseuki keu geutanjoë bandum.Seulaweuët dan saleuëm ta peutrôh keu djundjôngan geutanjoë Rasulullah Muhammad SAW.Meunan tjit keu sjuhada geutanjoë tameudo’a sabé beu lapang kubu dan neubri sjuruga.

Bak uroë 4 Desember njoë tapeuingat saban-saban uroë peunjata kemeurdéhkaan Atjèh. Uroë njang that meusidjarah keu bansa Atjèh dalam abad njoë. Bak uroë njoë djeuët tangui untôk tapeugot  saboh  keunira  akhé  thôn  dalam  ôseuha  peugisa  keulai  dèëlat  bansa  Atjèh  dan kateuntèë djeuët tjit tangui untôk peugot reuntjana peuë-peuë njang meusti tapeulaku supaja geutanjoë trôh bak tudjuan njan.

Akhé  thôn  leupah  geutanjoë  seupakat  untôk  peusaho  rakan-rakan  njang  meuseutia  keu perdjuangan dimijup pajông peurdjuangan Acheh-Sumatra National Liberation Front (ASNLF) atawa lam basa droëteuh takheun Atjèh Meurdéhka (AM). 

Peuët buleuën lheuëh njan, bak uroë buleuën 6-8 April 2012, ka keumaih ta meuduëk ngon peunutôh2  peunténg  njang  peuteuntèë  pakriban  dan  soë  peudjak  buët-buët  senambông perdjuangan Atjèh Meurdéhka. Dalam masa lhèë uroënjan ka ta peusahèh saboh konstitusi keu meunumat geutanjoë bandum dalam seuëh njoë, supaja buët-buët njang tapeudjak beuleubèh meuatô, teureuntjana dan bèk djisè u arah njang kon lam tudjuan peudong déëlat bansa. 

Bak uroë keuseuneulheuëh, peseurta2 duëk pakat njan ka neupiléh keutuha, waki keutuha dan anggèëta-anggèëta Presidium, sibagoë salah saboh badan ASNLF untôk peudjak amanahamanah perdjuangan Atjèh Meurdéhka.

Dalam  masa  keureudja  lapan  buleun  njoë  pihak  presidium  ka  geutjok  langkah-langkah konsolidasi ASNLF, peuturi droë bak badan-badan njang meukaét ngon peukara Atjèh dan njang that peunténg nakeuh brithèë dan bri peneurangan keu rakjat dan bansa Atjèh, bahwa perdjuangan Atjèh Meurdéhka mantong teudong lagèë geupula, hana meuakhé lom. 

Untôk peutingkat keumampuan keureudja peungurôh dan peugot hubôngan ngon pihak-pihak
laén, ASNLF ka geukirém peseurta dalam atjara-atjara peulatihan, miseuëdjih dalam  atjara-atjara njang djipeugot lé United Nations Human Rigths Council (UNHRC) di Djenèwa, Swiss dan Unrepresented Nations dan Peoples Organisation (UNPO) di Beulanda.

Meubagoë media lagèë website, blog, facebook, bulletin ka tapeugot dan tangui untôk peutrang peukara dan alasan Atjèh Meurdéhka dan sipreuëk haba-haba reusmi ASNLF. Watèë phôn tameugrak keulai, ramè njang hana meuphôm peuë dan pakon tapeudong keulai ASNLF, malah kajém tateurimong narit-narit tjeumarôt, khusuih djih dalam akun facebook geutanjoë. Tapi, liwat ôseuha-ôseuha penerangan njang tapeudjak sitjara meuatô  dan  dan hana pijôh-pijôh, deuh takalon ka mulai meu-ubah tjara pandang  dan tjara seumiké ureuëng-ureuëng njan. Mediamedia njang na di Atjeh pih ka djitém pasoë haba-haba geutanjoë.

Bahpih meunan, mantong le that buët njata dan mantong le that peureulèë ureuëng untôk djeuët  takheun  peurdjuangan  AM  akan  meuhasé.  Ramè  njang  teumanjong,  “Oh  na  ka peudjuangan AM?”. Watèë tapulang haba bak ureung teumanjong njan, “Peu njang ka neu peubuët uroënjoë keu peurdjuangan AM?”. Kajém hana meupeuë bri djeunaweuëb.

Peuëkeuh na rhôh tapiké kemeurdéhkaan Atjèh akan teuka meunan2 mantong, tanpa ikhtijeuë? Peuëkeuh buët rajek njoë ék geugulam lé padum-padum droë ureung mantong?Uôn jakin, geutanjoë seupakat,  bahwa  Atjèh han akan meurdéhka tanpa ôseuha dan do’a geutanjoë bandum.  Djadi  ka  sipatôt  djih  tapeudjak  agenda-agenda  keureudja  ASNLF  saban-saban, menurôt ‘ileumèë, seurta keumampuan njang na bak geutanjoë maséng-maséng. 

Keujakinan geutanjoë dan hana wéh-weuëh haté untôk tapeumeurdéhka tanoh éndatu teuh nakeuh pangkai dasar dalam tapeudjak buët njoë. Bahpih meunan, hana pat tapeusè, bahwa keumampuan ekonomi nakeuh salah saboh faktor peunténg njang peuteutèë peuëkeuh sabohsaboh agenda keureudja djeuët atawa meutheun bak tapeudjak.

Dalam hudép geutanjoë na masa seunang, na masa susah, na masa meuhasé na masa patah haté. Keugagalan sampoë ’an keutjiwa  dalam peurdjuangan Atjèh Meurdéhka nakeuh lagèë peukara-peukara  laén  dalam  hudép  si  uroë-uroë.  Geutanjoë  sabé  na  harapan  meuhasé, meunjo  keumah  tadong  tjot  keulai. Harapan  Atjèh  Meurdéhka  barô  akan  punah,  meunjo geutanjoë tapijoh lam ikhtijeu (tameunjeurah). 

Perubahan dalam sidjarah politék dônja djeuët takalon, dumnan lé tjeunto, bahwa hana peukara njang hana mungkén ateuh rhuëng dônja njoë. 

Sibagoë tjeunto, Skotlandia, saboh nanggroë dan bansa di ‘Irupah, bahpih ka djipeusaho dalam keuradjeuën  Inggréh  Raja  seulama  leubèh  nibak  300  thôn,  hana  djimeunjeurah  dari peudjuangan untôk meurdéhka. Bahkan dalam thôn 2013 akan djipeugot saboh referendum untôk keumeurdéhkaan nanggroë njan. 

Keu peukara njoë patôt that ta seumiké dan djeuët keupeuladjaran keu geutanjoë, pakon bansa Skotlandia njan djilakèë meurdéhka dari Inggréh,  njang djithèë sibagoë saboh nanggroë that madju di dônja njoë. Lagèë tateupeuë Skotlandia keudroëpih rakjat djih sidjahtra dan sibagoë salah saboh pusat ekonomi di ‘Irupah.

Tjeunto laén nakeuh Katalania, saboh bansa laén lom di ‘Irupah, ngon klub bola sipak njan that meusjuhu dan kota rajek  Barcelona, teungoh djiôseuha tjit untôk peuglah droë dari Spanjol. Katalania keudroë nakeuh saboh wilajah industri dan peurdagangan njang ka madju, tapi teutap djilakèë meudong keudroë, meurdéhka dari neugara Spanjol.

Dari dua bansa njan, deuh that trang keu geutanjoë heut meurdéhka bansa2 njan hana meuiseuk, bahpih ka meunan madju dan makmu. Pakriban ngon geutanjoë bansa Atjèh? Peuë ka meumada atawa kadjeuët lagèënjan?

Bak  akhé  buleuën  August  2012,  geutanjoë  katameulakèë  beudjeuët  keu  anggèëta  UNPO keulai, supaja na meunumat jang leubèh kong bak tapeugot kontak ngon pihak-pihak laén di tingkat  internasional.  Ban-ban njoë,  bak uroë buleun  28  Novémber  2012,  geutanjoë pihak ASNLF ka djiundang lé pihak UNPO untôk peutrôh haba peukara Atjèh. 

Njoë meumakna keu geutanjoë bansa Atjèh meusti keureudjabeu leubèh djeumot dan leubèh meu-atô lom, supaja tjita-tjita untôk peudong keulai dèëlat bansa geutanjoë reudjang meuhasé di tanoh éndatu. Akhé kalam, saleuëm meuthjén kamoë keu bandum bansa Atjèh njang mantong seutia keu peurdjuangan éndatu pat mantong ateuëh rhuëng dônja.

4 Désémber 2012


Ariffadhillah
Keutuha Presidium


Maklumat Oktober 2012

Maklumat njoë djeuët neu <<batja>> atawa  <<download>> lam beuntôk pdf beumangat neutjètak dan neusipreuëk teuma.

Bismillaahir Rahmaanir Rahiim

Maklumat

15 Oktober 2012


Bansa Atjèh njang mulia,

Deungon izin Poteuh Allah SWT, geutanjoë teutap tasambông peurdjuangan untôk peugisa keulai dèëlat Neugara Atjèh. Keu-inginan bansa geutanjoë untôk meurdéhka tjit han tom surôt dan peurdjuangan geutanjoë untôk peuteuntèë nasib droë njang sabé tapeudjak, peuë keuh di lua atawa di dalam nanggroë, deuh makén meutamah seumangat ladju. Meunan keuh buët geutanjoë njoë hana mungkén djipeugadoh lé sibeurangkasoë ureuëng atawa sibeurangkapeuë keulompok, sabab buët njang teungoh tapuga njoë nakeuh buët legal dan hak bansa Atjèh bak peuteuntèë masa ukeuë droë dan aneuk tutjo-geuh.

Su Atjèh Meurdéhka Lumbôi Dua

Su Atjèh Meurdéhka Edisi Keu Duwa <<batja>> <<downloads>>
Edisi seugohlom njoë: Su AM

Bismillahirrahmanirrahim,

Assalamu’alaikum warahmatullahi wabarakatuh,

Kru seumangat! Alhamdulillah Su Atjèh Meurdéhka lumbôi 2 ka teupeuteubiët keu mandum peudjuang njang mantong seutia keu tjita-tjita mulia Atjèh Meurdéhka.

Teupeuphôn haba teurimong geunaséh keu mandum rakan njang ka neubi sokongan dan seunambôt njang that djroh keu media informasi dan silaturahmi nibak Acheh-Sumatra National Liberation Front (ASNLF) njoë. Seumangat njang lambông dari ureuëng droëneuh mandum njan nakeuh beukai keu geutanjoë untôk tasambong keulai buët peurdjuangan njang gohlom seuleusoë.

Deungon seunang haté kamoë meupeutrôh haba keu mandum sjèëdara bahwa that rajek seunambôt njang geutanjoë teurimong dari kawôm muda seudang, geuneurasi ukeuë bansa Atjèh. Alhamdulillah. Insja Allah njoë keuh hareuta geutanjoë njang paléng meujum, njang leubèh meujum nibak minjeuëk bumoë ,meuh seureuta intan lam asoë bumoë Atjèh. Insja Allah hareuta njoë beudjeuët keuh keu keukuatan geutanjoë  njang paléng paléng kong, ubé kong iman dan islam lam tubôh droëteuh bansa mulia.

Teuma, dalam useuha ASNLF untôk peubeukai aneuk muda-muda Atjèh deungon ilmèë diplomasi, hukôm internasional, seurta hak asasi manôsia; kamoë ka meu-intat meupadum droë peurwakilan dalam peulatihan SpeakOut! 2012 di Den Haag, Beulanda. Taharap deungon beukai ilmèë njan, beudjeuët geuneurasi ukeuë geutanjoë geumeudjuang deungon tjara diplomasi internasional njang leubèh meumartabat dan leubèh seulamat keu rakjat Atjèh.  (Haba leubèh rintji teuntang peulatihan njoë djeuët neubatja bak tuléhsan-tuléhsan laén lam buletin Su Atjèh Meurdéhka edisi keudua njoë).

Deungon ta-ingat bahwa peundidékan keu kawôm muda nakeuh bahgian nibak keupeunténgan nasional Atjèh, maka taharap ukeuë njoë akan na lom peulatihan-peulatihan meutaraf internasional keu ureuëng-ureuëng muda njan. Teuma, taharap tjit ukeuë njoë makén le peurwakilan njang tateumeuëng intat lam forum-forum njang teumeukeusud. Insja Allah deungon beunantu dan sôkôngan dari ureuëng droëneuh mandum, tanggông djaweuëb geutanjoë keu geuneurasi ukeuë bansa djeuët tapeupunôh.
(red) *****

Su Atjèh Meurdéhka Edisi Keu Duwa <<batja>> <<downloads>>
Edisi seugohlom njoë: Su AM

Bèk Ta Boih Basa

Keunarang: Zard Atjèh 


Salam'alaikôm Tengku ngon Tjut Njak 
Beurangho tadjak bèk ta boih basa
Basa geutanjoë saboh amanat 
Sinan keuh ummat djituri bansa

Meungnjo basa hana ta pakoë
Pané hai adoë tanjoë mulia
Hana djituri lé ureuëng nanggroë
Pané djipakoë lé bansa dônja

Haba Peu-Ingat: Tja-é Wali Nanggroë Bab II


keunarang Iqbal Al-Farisi

Bab keu phôn


Leubèh lhèë plôh thôn ka geupeudjuang
Darah meukubang dum aneuëk bansa
Kon keu peureuté pangkat djabatan
Peuë lom hai rakan djeuët lamiët djawa

Dép na keuh rugoë wahé intan
Dép na ka keurban dum aneuëk bansa
Dép na ka jatim bansa lôn sajang
Rata djeuët simpang dum inong djanda

Seunambôt Buleuën Puasa

Keunarang Iqbal Alfarisy 

Alhamdulillah pudjoë keu Tuhan 
Njang peudjeuët alam dum manusia 
Seulaweuët saleuëm ukeuë djandjôngan 
Panghulèë alam nabi mustafa 

Lam masa tan trép tanjoë hai rakan 
Ka trôk lom pulang Ramadhan teuka 
Djak saweuë tanjoë ummat djandjôngan 
Njang sihat badan dan hana gila