Siaran Pers
26 Désèmbèr 2012
Lapan Thôn Lheuh Tsunami
Asssalamu'alaikum wr.wb.
Bismillaahir Rahmaanir Rahiim...
”Walanabluwan nakum bisjai-in minal khaufi wal djuu'i, wanaqshim minal amwaali wal-anfusi wats-tsamaraat. Wabasj-sjirish-shaabiriin. Alladhiina idhaa ashaabathum mushiibatun, qaaluu: Innaa lillaahi wainnaa ilaihi raadji'uun. Ulaa ika 'alahim shalawaatun min rabbihim wa rahmah. Wa ulaa ika humul muhtaduun.” (Al-Baqarah: 155-157)
Uroënjoë 26 Désèmbèr 2012, geunap lapan thôn musibah geumpa dan tsunami njang ka peuhantjô peuë-peuë njang na di nanggroë Atjèh; saboh malapeutaka njang paléng rajek njang ka peuguntjang dônja dan peuhantjô haté geutanjoë njang mantong hudép uroënjoë. Musibah geumpa dan tsunami njoë kadjeuët keu saboh tragedi nasional keu bansa Atjèh. Dalam padum-padum minet sagai meurutôh ribèë bansa teuh: inong-agam, thjik-putik, tuha-muda, kaja-gasiën ka djiba lé ië raja, meusigo deungon bandum hareuta boinahneuh: rumoh, muto dan laén-laénl lom. Allaahu akbar, Allaahu Akbar, Allaahu Akbar walillaahil Hamd...
Bansa Atjèh njang Mulia,
Uroënjoë, kamoë dari ASNLF, meuheut sambông silaturrahmi dan peutrôk saleuëm seudéh dan rôgha ukeuë bandum bansa Atjèh pat mantong ateuëh rhuëng dônja njoë. Bak uroë meuseudjarah njoë geutanjoë tapuduëk u geuniréng dilèë siat peuë mantong peukara njang pedjuôh/peutjré geutanjoë seusama aneuk bansa. Uroënjoë ta duëk siat ta-ingat dan takadji keulai udjoë njang ka Allah bri keu geutanjoë supaja geutanjoë bèk teukabô, udjôb dan teumeu'a watèë ka Neubri batjut nikmat dan rahmat Droëuneuh.
Dari surat Al-Baqarah, ajat 155-157 di ateuëh saknjoë djeulaih that Neupeutrang uléh Po Teuh bahwa musibah (tsunami) njan nakeuh saboh udjian atawa saboh peu-ingat Allah, khususdjih keu geutanjoë bansa Islam Atjèh, supaja geutanjoë sadar akan tanggông-djaweuëb geutanjoë deungon Po Teuh, supaja geutanjoë bèk lalè deungon kepentingan dônja meululu dan supaja geutanjoë tathèë droë-teuh batjut bahwa geutanjoë, hareuta seurta aneuk porumoh teuh dan peuë mantong njang paléng tasajang nakeuh milék Allah simata-mata. Dan padjan mantong Neukeuneuk tjok pulang, hana soë keumah tham dan halang, lagèë ka Neupeudeuh dalam musibah tsunami 8 thôn njang ka ulikôt.
Dalam Al-Quran le that kisah-kisah teuntang kekuasan Allah njang meusangkôt deungon musibah, leubèh-leubèh watèë buët asoë nanggroë njan ka meuradjalela that: watèë buët maksiët ka djeuët keu buët siuroë-uroë, watèë buët hareuëm dan Neutham kadjeuët keu biasa dan watèë buët beuna dan salah ka meulawok-lawok.
Keudjadian ië bah ateuëh kawôm Nabi Noh Alaihissalam; keudjadian ateuëh kawôm Fir'un bak masa Nabi Musa; ummat Nabi Luth; kawôm Aad dan Tsamud njang Neupeutren angèn badèë atawa angèn tofan. Allah hana Neupeutren bala keu ureuëng njang hana seumatéh mantong, teutapi Neu-udjoë tjit ureuëng njang djroh-djroh. Nabi-Nabi njang Po Teuh gaséh dan sajang hana luput tjit nibak keunong udjoë: lagèë nabi Yunus njang pajah grôp dalam laôt dan djipeuseulamat lé eungkot pawôh; nabi Zakaria dan Yahya, dan nabi Aiyub njang Neupeugasiën lheuëh Neupeukaja, Neubri matjam-matjam peunjakét. Dari keudjadian-keudjadian njoë keuh geutanjoë djeuët tatjok saboh 'itibar, tatjok keu peuladjaran, ta meurunoë bahwa musibah Neubri tjit keu ureuëng njang djroh-djroh njang Droëneuh sajang.
Bahpih meunan, na tjit njang peugah bahwa musibah tsunami njan nakeuh saboh murka atawa saboh hukôman nibak Po Teuh Allah keu bansa geutanjoë kareuna le that buët dhalém ka teudjadi di bumoë Atjèh, kareuna peundudôk Seuramoë Mekkah njan ka meuradjalela that, kareuna njang po peurintah di Atjèh seulamanjan nakeuh pihak-pihak njang na beudé bak djaroë, dan kebenaran na sabé bak TNI dan TNA bak masanjan. Seudangkan ureuëng-ureuëng malém, ureuëng njang djroh-djroh teumasôk ulama tuduëk bak sagoë dan hana pat peugah haba. Djadi njan keuh sabab mungkén Neupeutren bala ateuëh bansa Atjèh?
Peundapat njang lagèë njoë kon hana alasan tjit. Le ajat-ajat sutji njang peutunjok bahwa bala njan kajém Neupeutren ateuëh saboh-saboh bansa atawa kawôm njang ka laloë deungon peukateuën dônja dan ka tuwo keu hudép di akhirat. Dhaharal fasaadu fil barri wal bahri bimaa kasabat aidin naasi lijudhiija qahum ba'dhal ladhii 'amiluu la'allahum jardji'uunn” (Ar-Rum: 41)
Geutanjoë musti tapham bahwa musibahnjan nakeuh saboh sunnatullah njang hana saboh kuasa pih njang ék lawan ateuëh kheundak Droëneuhnjan. Dan apabila Neukheundak sipeuë-peuë dan Neukheun: ”kun” maka akibat djih handjeuëthan ”fa jakun”.
Uléh sababnjan, kamoë tawôk bak bandum bansa Atjèh njang teungoh laloë deungon harta, keuseunangan dan kekajaan njang meulimpah, hasé nibak buët-buët korupsi dan peungeut pèng rakjat, supaja gisa keulai bak buët njang butôi jôhgohlom bala Tuhan njang leubèh rajek lom akan teuka. Ingat peuë Neukheun uléh Po dalam surat Al-Humazah: “Tjeulaka keu tôkkang meu-upat dan peugah-peugah keu gob; njankeuh ureuëng-ureuëng njang peusapat hareuta dan gadôh bileuëng-bileuëng njan sabé. Djikira hareuta njang na bak djihnjan akan peugot djih han maté-maté lé”. Kon saga-sagai! Awaknjan bandum akan Neusumpom dalam nuraka Huthamah.....”.
Keu keuluarga njang mantong hudép supaja teutap saba dan tabah bak geuhadapi musibah njoë dan beuleubèh toë lom deungon Po Teuh Allah. Kareuna di balék musibah njan teukandông hikmah njang geutanjoë manusia han ék tapham. Bahwa Allah keuh sidroë teumpat geutanjoë lakèë tulông dan bak Droëneuhhnjan keuh geutanjoë seurah droë-teuh.”Hasbunallah wa ni'mal wakiil, ni'mal mawla wa ni'man nashiir” – Séb keu Allah njang peulindông kamoë dan Droëneuhnjan keuh sigot-got peulindông. Amin, Amin....
###
Hubông kamoë:
Madinatul Fajar
Keutuha Sekretariat ASNLF
email: madinatul.fajar@gmail.com
<<download pdf>> <<batja pdf>>
No comments:
Post a Comment