Su Atjèh Meurdéhka Lumbôi Sa

Su Atjèh Meurdéhka Edisi keu phôn: <<batja>> <<download>>

Bismillahirrahmanirrahim,

Alhamdulillah, Acheh-Sumatra National Liberation Front / Atjèh Meurdéhka (ASNLF/AM) ka neupeuteubiët saboh media peuneurangan tjètak keu bansa Atjèh dalam beuntuk buletin. Rajek that harapan geutanjoë deungon na media njan akan teupeutrôh informasi keu mandum rakjat Atjèh teuntang peurkeumbangan peurdjuangan Atjèh Meurdéhka njang teungoh tapeudjak di Nanggroë meunan tjit diluwa Nanggroë .

Buletin njang neuboh nan Su Atjèh Meurdéhka njoë nakeuh atra geutanjoë mandum bansa Atjèh. Buletin njoë djeuët neubatja atawa neudownload rot link njang na di ateuëh dan di mujup tuléhsan njoë. Rajek that harapan akan na inisiatif geutanjoë saré keudroë-droë teuh untôk tatjètak dan tasipreuëk Su AM njoë, paléng kureuëng untôk geubatja lé keluarga dan keurabeuëk-keurabeuëk droëteuh masén-masén.

Beuthat pih meunan, teumeulakèë bak geutanjoë mandum untôk sabé tadjaga droëteuh dan keluargateuh dari meubagoë antjaman musôh dan djaroë gaki djih njang bit hana galak keu peurdjuangan njoë. Insja Allah geutanjoë akan tapeukong ladju djaréngan informasi saré keudroë-droë teuh bansa Atjèh mangat djeuët tapeugléh mandum fitnah dan rasa brôk sangka njang ka djiseubèë lé musôh dan djaroë gaki djih untôk dipeuantjô keukuatan geutanjoë bansa Atjèh, njakni rasa peutjaja, rasa sajang, rasa meusaboh haté dan pikéran geutanjoë saré bansa Atjèh.

Saleuëm Meurdéhka,

Su Atjèh Meurdéhka Edisi keu phôn: <<batja>> <<download>>

Perdjuangan Bangsa Atjèh Gohlom Seuleusoë


Dr. Husaini Hasan
Thursday, May 15, 2008 5:04:50 AM
Perdjuangan bangsa Atjèh gohlom seleusoë

Le ureuëng Atjèh njang meunganggap perdjuangan bangsa Atjèh ka seuleusoë watèë perdjandjian perdamaian antara GAM deungon RI ka djitèkèn di Helsinki bak 15 Agustus 2005. Dan uléh GAM Njang geupimpin uléh Malek Mahmud dan Dr. Zaini Abdullah geupeujakin rakjat Atjèh bahwa Atjèh ka meurdèhka dan bandum beudé geujuë peutrén dan setjara demonstrativ geukoh-koh bandum.

Menurut analisa ulôntuan, dalam sueuë keumeurdéhkaan Atjèh pasca MoU Helsinki , kon kemadjuan njang tateumeung meutapi perdjuangan keumeurdéhkaan Atjèh mesurôt u likôt. Perdjuangan bangsa Atjèh untuk meurdéhka ka leubèh panjang dan leubèh complicated atawa leubèh puëh.

Peukara Bitjah-Blah Bansa Atjèh Di Eropa


DOKUMEN NEGARA
PEUKARA BITJAH-BLAH BANSA ATJÈH DI EROPA

Geususôn
Uléh
Mustafa Djalil dan M. Yusuf. Daud

Stockholm, 10 Oktober, 1997

Bismaillahir Rahmaanir Rahiim
”HAI UREUËNG2 NJANG MEU-IMAN , meunjo trôk bak gata ureuëng fasèk (awak paléh2) djidjak ba haba, maka handjeuëthan tasidék (taparéksa beu butôi2 dilèë jôhgoh tapatéh) supaja bèk meu-élanja ureuëng laén, sabab gata hana éleumèë - hana tateupeuë-sapeuë - dan akan teulaih teuh ateuëh peuë njang tapubuëtnjan”Surat Al-Hudjarat: 6.

”HAI UREUËNG2 NJANG MEU-IMAN, tameudong beukong bak keu-adélan dan ta-ék saksi ateuëh nan Allah bahthatpih keunong ateuëh droë-teuh, atawa ateuëhma-ku teuh atawa ateuëh keurabeuëk2 teuh. Bôh kaja atawa gasiën, Allah leubèh toë deungon sipulan njan nibak deungon gata. Djadi bèk sagai2 taturôt hawa nafsu seuhingga gata hana tameusikap adé, dan meunjo gata tapaléng - han ta-ék saksi ateuëh kebenaran - maka beuta-ingat bahwa Allah neuteupeuë bandum buët gata njan.” Suart An-Nisa’: 134.

”HANDJEUËTHAN GATA tapeubeuna buët njang beuna dan tapeusalah peuë njang salah, bahthatpih awak ku’èh2 hana galak djih.” Surat AL-Anfal:8

Piala Irupa 2012 - Sweden: "Aneuk Muda Film India"


ôléh: Asnawi Ali

Beuklam awak Svenskar ramé that kalon sipak bhan watèë Sweden lawan Ukraina.Meusabeub djinoë teungoh musém su-uëm dan tjuti, meubagoë tjara bak kalon hiburan sipakbhan njan, na lam lapangan luah, lam restauran, lam bar, lam rumoh dll. Disinoë, peurtadingansipak bhan ka djeuët keuhaba tiëp-tiëp uroë bak media meusabab Sweden na rôh lam kawan bakmeureupah djuara piala Irupa.

Nibak akhé buleuën njang kalheuëh, Sweden seugolomdjih lumbôi sa meunang bak masa lomba lagu nanggroë-nanggroë Irupa. ”Nan Sweden ka di ék ôn lumbôi sa lam kawasan Irupa dan djinoë dak djeuët beumeunang lumbôi sa lam peurtandingan sipak bhan tjit” meunan haba rakan-rakan svenskar njang sapat bak teumpat keuridja. Djadi hana that hireun meunjoë beuklam, meunurôt data njang djipeusapat le SVT--TV Sweden-- paléng dhiët seukita 3 djuta droë awak Svenskar kalon siaran langsông liwat TV.

Teuma lawan Sweden di Grup D kon tjilét-tjilét! Bak phôn kon ka pajah lawan ureuëng po nanggroë, Ukraina. Zlatan Ibrahimovic seubagoë kapten peumeuén bhan Sweden brat that tanggong djaweuëb lam piasan njoë. Awak Ukraina keubit that ramè lam stadion, watèë djisurak meubura-bura. Bah that pih meunan seumangat Sweden han keundô sampoë meuhasé djipeulôp sineuk bak minét 50. Teuma hana trép lheuëng meupadum minét, Andrej Sjevtjenko meubalah peulôp lam gôn Sweden 2 neuk sampoë habéh akhé masa 2-1 keu Ukraina. Lagèë aneuk muda film India, Ukraina meu-én sipak bhan talô djilèë lheuëh njan meunang bak akhé. ”Bak deuh Ukraina meunang sabab djimeu-én lam gampong droëdjih, atjibak teumpat laén, ulôn jakin Sweden leubèh kha bak sipak bhan” meunan narit tjhating sidroë rakan bak Fesbuk njang bila Sweden.

Peurtadingan gohlom seuleusoë! Sweden mantong optimis sabab na dua go teuk peurtandingan lawan Inggréh uroë Djum’at njoë dan lawan Peurancih uroë Lasa minggu ukeuë. Meunjoë teukeudi pih Sweden talô lom, sang hana harapan lé dan kadjeuët bungkôh badjèë woë gampong u Stockholm. Bah Sweden bèk rhôt seumangat, na rakan Atjèh peugah bak Fesbukkeu gura-gura: ”Sweden djinoë peugot droë mantong lagèë aneuk muda film India”.

Örebro, Sweden, Lasa, 12 uroë buleuën Apam 2012

Spanyol Meukarat Ekonomi

ôléh: Asnawi Ali

Mata dônja bideuëng olah raga djinoë djiikeureuléng u Irupa sagoë Polandia dan Ukrainia sabab disinan djinoë teungoh na meulômba sipak bhan piala Irupa. Lam ruweuëng meugah sipak bhan piala Irupa njan, ramé njang hana teupeuë bahwasadjih ékonomi nanggroë-nanggroë Irupa teungoh brat sakét lagèë; Yunani. Nanggroë nyang laén teungoh gôjang, salah sabôhdjih Spanyol. Meupadum minggu u likôt peurdana meuntroë Spanyol, Mariano Rajoy, djipeutubiët narit bahwasadjih Spanyol hana peureulèë pindjam pèng dari Uni Irupa keu peuseuleusoë ékonomi nanggroë droë djih.


Teuma jinoë, Mariano Rajoy dan kabinèt peumeurintahdjih kapajah bot djaroë dan Spanyol ka meukarat pajah meu-utang pèng bak nanggroë-nanggroë lam Uni Irupa. Ulèë peumimpin nanggroë-nanggroë Irupa geutulông pindjam péng keu Spanyol deungon raja lagoina seukita 50 - 100 miljar euro. Seugolomdjih, bank-bank di Spanyol djai that djibi pindjam pèng keu rakjat droë djih sampoë perusahaan han keumah bajeuë keulai, terumasôk bungong. Njang meukarat ékonomi rakjat Spanyol bak bajeuë djinoë na keuh utang, tamah lom djitjeukak lé bungong.

Örebro, Sweden, Seulanjan, 11 uroë buleuën Apam 2012


Peusan Uroë Njoë
12 Mai 2012


Keu Bandum Bangsa Atjèh,

Assalammu'alaikum w.w.

Ka rhab 140 thôn lheuh Keuradjeun Beulanda djipeunjata prang ateuëh Neugara Atjèh njang meudèëlat, trôk 'an uroë njoë ka rhab bandum bangsa Atjeh hana geupijôh dan mantong geusambông peurdjuangan untôk peuglah droë dari sigala matjam useuha untôk peuduëk Neugara Atjeh djimijup kuasa pihak aséng.