Salam'alaikôm Tengku ngon Tjut Njak
Beurangho tadjak bèk ta boih basa
Basa geutanjoë saboh amanat
Sinan keuh ummat djituri bansa
Meungnjo basa hana ta pakoë
Pané hai adoë tanjoë mulia
Hana djituri lé ureuëng nanggroë
Pané djipakoë lé bansa dônja
Beuthat ka tadjak u luwa nanggroë
Sagai bèk tuwo keu basa Poma
Peureunoë bagaih keu aneuk droë
Bèk sampoë laloë ngon bansa luwa
Ta eu di Tjina ka tréb meuranto
Meu aneuk tjutjo bansaboh dônja
Meungnjo di marit deungo kawôm droë
Han sagai tuwo basa Tjhèng-tjhong wa
Di Tengku Atjèh laén lom bagoë
Barô meuranto 'èt kuta Langsa
Keu basa Atjèh hana lé pakoë
Ladju ka tuwo keu basa Poma
Peureunoë aneuk basa melaju
Ladôm djidjampu ngon basa Djawa
'Oh woë u gampông meusangak-sangak
Lèh panè sinjak modèrèn raja
Watèë geumarit basa melaju
Peuleumah bak Du na rasa bangga
Keu basa Atjèh tjit hana muphôm
Ka tréb meuthôn-thôn di kuta Langsa
Bak watèë ta eu, gli dalam haté
Sang gob hana lé njang djeuët mu-basa
Sang gobnjan mantong tjarong peulaku
Habéh ngon-ngon buë ka basa Djawa
Wahé e tjutkak lôn peugah mantong
Djinoë ta peukong basa ibunda
Peureunoë aneuk njan basa Atjèh
Sinan that leubèh kaja budaja
Basa Atjèh tréb that ka meugah
Abad keu namblaih ka djithèë lé dônja
Djeuët ta kalon dalam sedjarah
Got meukeubah lam museum Beulanda
'Èt noë keuh dilèë wahé e rakan
Batjut bahasan keu hai basa
Beuthat di ulôn handjeuët keumarang
Lôn tjuba rakan rangkaian kata
Alèh na beutôi alèh pih salah
Narit lôn peugah asai meukana
Meu'aih rakan droë keu ulôntuan
Alèh panè djan ta sambông teuma
*****
No comments:
Post a Comment