keunarang Iqbal Al-Farisi
Bab keu phôn
Leubèh lhèë plôh thôn ka geupeudjuang
Darah meukubang dum aneuëk bansa
Kon keu peureuté pangkat djabatan
Peuë lom hai rakan djeuët lamiët djawa
Dép na keuh rugoë wahé intan
Dép na ka keurban dum aneuëk bansa
Dép na ka jatim bansa lôn sajang
Rata djeuët simpang dum inong djanda
Bak thôn tudjôh nam batjut lôn riwang
Trôk Teungku Hasan buët phôn geumula
Deungon bôt ubeuët laôt geuseubrang
Bah pih di hantam lé badèë raja
Bah that pih rajek laôt geulômbang
Teutap geuseubrang seulat Malaka
Hana geutakôt geuh djeuët keu karam
Asai tudjuan beutrôk ban pinta
Geukubah inong njang that geusajang
Ngon aneuëk agam si bidjéh mata
Hana hareuta geuba bak badan
Tjuma seunapan ngon timbak rusa
Wali geuteungoh bak saboh lapang
Tan djeu-ôhngon njan na miëng kuwala
Trôk ureuëng gampong Wali geugulam
Geubi makanan si ala kada
Njang dari Tiro hana trôk keunan
Dari Kumangan pih hana teuka
Dari Teurubuë hana deuh ruman
Peuë lom hai rakan dari Keumala
Muzakkir Manaf hana trôk keunan
Karia Saman pih tan deuh rupa
Toto Zaini hana deuh sinan
Peuë lom hai rakan lagèë Li Paya
Sjèëdara Wali hana trôk keunan
Njang djak eu gop njan njang ban trôk teuka
Meu léng léng mata Wali watèë njan
Dép nan keuh rakan Wali geurasa
Tjuma njoë ilèë haba lôn karang
Lôn sambông teuma bak bab keu tiga
Lôn lakèë meu'ah ngon haté lapang
Kadang hai rakan tutô lôn gasa
*****
No comments:
Post a Comment