Amanat Peu-ingat Milad AM Njang Keu 37

 

Amanat Peu-ingat Milad AM njang keu 37 di Hällefors
4 Désèmbér 1976 – 4 Désèmbér 2013

Assalamu’alaikum warahmatullahi wabarakatuh.


Bismillahir rahmanirrahim,

Wa'tashimuu bihablillahi jamii''an walaa tafarraquu. Wazkuruu ni'matallahi 'alaikum, iz kuntum 'adaa an fa allafa baina quluubikum. Fa ashbahtum bini'matihi ikhwaana. Wa kuntum 'alaa sjafaa hufratim minan naar, fa ankadhakum minha. Kazaalika jubaijinul laahu lakum aajaatihi la'allakum tahtaduun. Al-Imran, ajat 103.Shadaqallahul 'adhim.


Hadhirin/hadhirat njang ulôntuan peumulia, bandum djama’ah njang meusapat disinoë uroënjoë, dan bansa Atjèh pat mantong geuhudép uroënjoë. Njang that meutjhén, bansa Atjèh di tanoh ië sidéh di nanggroë. Njang that tagaséh adoë dan aneuk-aneuk geutanjoë bandum, generasi njang akan sambông perjuangan Atjèh Meurdéhka dan peutheun dèëlat dan marwah bansa ukeuë.

MUKADDIMAH

Alhamdulillah, deugon izin Po Teuh Allah, uroë njoë geutanjoë ka keumah tameurumpok disinoë untôk tapeu-ingat uroë lahé Atjèh Muerdéhka njang keu 37 di Hällefors, Sweden. Dalam peurdjuangan keumeurdéhkaan saboh2 bansa, masa 37 thôn njan paneuk that meunjo tabandéng deungon le rakan2 geutanjoë njang saboh nasib, dimijub Indonesia, lagèë RMS, OPM. Meunan tjit sjèëdara2 geutanjoë di nanggroë djiran, lagèë Pattani dan Bangsa Moro, njang leubèh awai meugrak nibak geutanjoë dan mantong teungoh gepeudjuang ladju. Dan, Insja Allah, awai atawa teulat, geutanjoë akan meuhasé, asai beusabé istiqamah dan meudong bak prinsip.


Jôh gohlom ta marit peukara2 peunténg njang teungoh teudjadi di nanggroë uroë njoë dan njang akan teudjadi ukeuë, peureulèë geutanjoë kalon ulikôt batjut seulama sithôn-dua njoë.


ASNLF/UNPO

Lagèë ka tateupeuë, thôn 2012, ateuëh inisiatif nibak padum2 droë rakan di Eropa, geutanjoë ka keumah tapeugot saboh meusapat rajek di Denmark bak uroë 6-8 April, untôk tapeu-hudép keulai organisasi ASNLF, lheuëh tudjôh thôn hana aktif dan hana fungsi lé. Dan lheuëhnjan le keumadjuan2 njang ka tateumeung, antara laén, ka keumah tapeuna akses keulai deungon markas PBB di Djeuneva, ta rôk kaulai hubôngan dan keuridjasama deungon UNPO. Dan, dalam padum2 go keuseumpatan, ka keumah takirém aneuk2 muda Atjèh untôk djak ikôt training dalam peukara diplomasi dan hak2 asasi manusia di Nanggroë Beulanda. Le njang ka tapeugot, tapi mantong le that njang pajah tapeugot lom ukeuë. Insja Allah, deungon beunantu nibak rakan2 seutia njang na dilua dan sokongan moral nibak bansa di nanggroë, ukeuë akan le njang djeuët tapeulaku lom.


Seulaén buët2 diplomasi di luwa, konsolidasi dan sosialisasi u dalam pih hana kureuëng tjit geupedjak uléh rakan2 njang na diluwa, supaja djeuët tabina saboh keuridjasama njang djroh – luwa dalam. UNPO njan nakeuh saboh organisasi antara bansa njang na leubèh-kureuëng 50 neugara anggota njang hana waki di PBB. UNPO njan saboh forum njang bri access atawa buka djalan keu anggèëta geuh untôk djeuët tamong dalam forum2 internasional njang leubèh rajek lom, peuhubông/peusambông deungon badan2 dônja lagèë PBB, perlemen Eropa dll.


Walaupun ASNLF gohlom djeuët keu anggèëta rasmi UNPO, tapi geutanjoë ka na keurdjasama njang rapat deungon organisasi njan dalam bideuëng diplomasi, kampanje, peundidékan dls.Forum dan fasilitas ka teuseudia, dan djinoë teuseurah bak geutanjoë padip le teunaga geutanjoë, teuseurah bak geutanjoë padim tjarong geutanjoë bak tangui forum dan peuleuweuëng njang ka na njan. Teunaga ahli njang na dalam Presidium dan sekretariat teubataih that. Kamoë peureulèë beunantu dan sokongan dari bandum bansa Atjèh pat mantong ateuëh rhuëng dônja dalam dalam dumpeuë peukara: kamoë peureulèë teunaga njang tjarong2 untôk peugot buët2 peunténg di luwa: djeuët geulibat droë langsông u dalam organisasi deungon trang-trang dan djeuët tjit geubantu deungon tjara seungap2. Atjèh Meurdéhka njoë milék bansa Atjèh. Saran, pikéran dan kontribusi2 laén lom kamoë prèh nibak soë mantong njang meuseutia deungon tudjuan nibak peurdjuangan njoë.


ISU SEUMASA

Di nanggroë djinoë siat memang le that masaalah, bathatpih ka 8 thôn ka damé deungon RI. Peuë mantong issue, bandum djeuët keu hareuga maté. Meunjo bak pilkada piléh keupala daerah thôn 2012, hareuga maté djih peukara tjalon independent, maka pilkada thôn ukeuë njoë hareuga maté djih peukara bandera dan wali nanggroë.


Bak awai thôn 2014 njoë, hana tréb lé, akan na pilkada piléh anggèëta legislatif untôk DPRK dan DPRA – tamah lom deungon peumiléhan presiden peundjadjah RI. Meunjo takalon peungalaman2 njang ka ulikôt, teumasôk njang paléng barô ban-ban njoë di Pidie Jaya dan Subulussalam, pilkada go njoë mungkén akan le tjit rubah ureuëng lom. Tameulakèë bak Po bèk. Njang djeuët keu hareuga maté keu salah saboh parté lokal di nanggroë djinoë nakeuh: peukara bandera buleuën-bintang dan Wali Nanggroë. Kon meukuë-kuë dan tulak tarék ngon Djakarta mantong, teutapi ka teudjadi pro-kontra njang lua-biasa di kalangan masjarakat Atjèh keudroë.


Peukara Bendera: Lagèë peukara bandera buleuën-bintang, miseuë djih: bandum ureuëng geuteupeuë, njan bandera Atjèh Meurdéhka. Hana kureuëng nibak 50.000 sjuhada bansa ka geubri hareuta dan djawong geuh bak geupeutheun bandera njan seulam 37 thôn njoë. Uroë njoë uléh gaki djaroë RI di Atjèh djikeuneuk peulôb bandera njan dimijub saboh privinsi NKRI. Peuë makna njan? Kon ka djikhianat keu meuplôh ribèë para sjuhada mantong, teutapi saban tjit lagèë ka djipeunjata prang ateuëh geutanjoë,bansa Atjèh njang mantong meuseutia dan sambông peurdjuangan njoë. Njoë ingat beugot, handjeuët tuwo, tjatet njoë. RI djipeugot filem Tjut Njak Diën djisalôp deungon bandera mirah putéh; dji apa Atjèh njoë, lheuëh geulôp droë-geuh dalam NKRI, ubéna keudo2 Atjèh Meurdéhka djikeuneuk sampôh bandum, djikeuneuk samak bèk meupat meu-euntjit pih lé, supaja ukeuë bèk na lé njang keumah peuhudép keulai peurdjuangan keumeurdéhkaan njoë. Teutapi uroë njoë ka leumah bukti, Allah han neu-izin buët2 karôt dan laknat njan.


Peukara Wali Nanggroë: Meunan tjit neuduëk Wali Nanggroë, bandua peukara njoë peudeuh deungon trang that bahwa awaknjan keuneuk peupalsu seudjarah! Memang meunurôt MoU Atjèh na hak peugot Lembaga Wali Nanggroë sibagoë lembaga adat untôk urôih peukara-peukara adat-reusam njang na di Atjèh. Teutapi meunjo tabatja Qanun WN njang ka djisah le DPRA, disinan keukuasaan wali nanggroë di ateuëh bandum diktator lam dônja uroë njoë. Subatji piké, ubéna harta pusaka atawa boinah Atjèh di dalam dan di luwa nanggroë bandum milék PJM wali nanggroë; WN djeuët peutjat Gubernur dan soë mantong; WN djeuët bubar parlemen, dls. Dan wali nanggroë njang djikeuneuk lanték, mungkén buleuën ukeuë njoë, nakeuh wali nanggroë njang keu-9. Su-euë djih: pakriban mungkén Institusi Wali Nanggroë njang lahé di Helsinki thôn 2005 uroë njoë keumah djisunglap ka na sikureuëng droë wali? Peuë awaknjan sithôn sigo djigantoë wali?


Pakon atranjan keumah djipeulaku bandum? Kareuna ureuëng Atjèh keudroë ka geutém....? Bahthat hana bandum. Hana soë djak peuhina geutanjoë, meunjo geutanjoë han tatheun djihina: Saidina Ali radhiallahu 'anhu na tom neukheun: Gata hana keumah gob djadjah, keutjuali na izin droë-teuh. Kheun Martin Lutherking: Ureuëng hana keumah djiék ateuëh rhuëng gata, keutjuali gata ka tapeubungkôk droë-teuh, ka tatém theun rhuëng. Meunjo geutanjoë han tatém meudong bak peukara2 njang prinsipil, peukara2 njang peunténg lagèë peukara hak geutanjoën untôk meurdéhka, peukara marwah geutanjoë, njang teungoh djigilho-gilho uroë njoë buët bansa droë-teuh, maka geutanjoë akan rubah teugageuëng deungon meusipak peuluntjôt.


Peukara Pemilu: Lagèë ka tameutjukot di ateuëh bunoë, 2014 njoë akan na pilkada di nanggroë. Peuë sikap geutanjoë? Pemilu gob peunan deungon pesta demokrasi. Njan kadjeuët keu saboh péasan dônja djinoë. Lagèë kalheuëh geutanjoë peutrang dalam siaran2 Atjèh Meurdehka, bahwa dalam prinsip peumilu Indon njan hana hubôngan sapeuë deungon Atjèh Meurdéhka. Djipeugot hana untông keu geutanjoë, hana djipeugot pih hana laba keu geutanjoë. Ingat, ASNLF nakeuh saboh gerakan politék njang tudjuan djih untôk peumeurdéhka Atjèh. Peuë mantong njang meu-untông keu peurdjuangan akan tapeudjak, dan peuë mantong njang peugot rugoë keu peurdjuangan bèk peugot. Njang bèk sagai meurôn-rôn deungon hana tudjuan njang djeulaih!


Peukara dekadensi moral: Saboh treuk peunjakét njang paléng kronis di nanggroë nakeuh krisis iman dan krisi moral, njang ka meu-ukheuë dan kadjeuët keu puntja nibak le masaalah. Meunjo akhlaq ka meurosot atawa ka runtôh dalam saboh2 masjarakat, maka dumpeuë pih akan tjeulaka. Dalam saboh hadits sahèh Nabi neukheun:Innama bu i'stu li utammima makaarimal akhlaaq. Keubit2 ulôn njoë geu-utôih untôk peuseumporna/peubutôi akhlak.


Watèë ta kalon peukateuën si uroë2 di nanggroë lawétnjoë, lagèë peukara korupsi uléh, kriminalitas dan buët2 maksiët laén njang makén meuradja léla ladju, rhôh ta tanjong bak droë-teuh: Pakon nanggroë lôn dumnan ka hantjô? Peuë njang kureuëng bak geutanjoë? Peuë kareuna kureuëng pèng atawa njang mat pimmpinan hana butôi? Man meunjo Djakarta djitamah dana otonomi meupadum Triliun treuk dan Zaini Abdullah tagantô deungon Zaini2 laén lom, peuë Atjèh akan otomatis leubèh got? Hana teuntèë tjit, sabab masalah pokok gohlom seuleusoë. Hubôngan status quo Atjèh-Djakarta – antara peundjadjah deungon njang djidjadjah - ka peugot bandum aspek hudép, teumasôk moral bansa teudjadjah, ka tupuë deungon peurangoë tuwan di Djakarta.


Watèë moral sidroë-droë ureuëng ka rusak, maka manusia njan ka gadoh malèë dan hana seugan2 lé djipubuët buët salah. Malèë njan nakeuh saboh kualitet njang paléng manjang bak manusia,sabab sifeuët malèë njan akan teugah manusia nibak buët-buët njang meulanggéh. Meunjo sifeuët malèë tapinah bak sidroë-droë ureuëng, maka akan gadoh bak ureuëng njan sifeuët2 kemanusiaan djih- ka saban lagèë atra peuët gatéh. Bak si man njan hana lé berlaku atôran: djeuët djirot peuë2 njang rhôh; djirhak ho2 njang galak djih; atra gob-atra djih; haleuë-hareuëm hana bida lé keu djih. Njoë akibat djih meunjo ureuëng ka gadoh moral. Nabi na tom neukheun: Fa in lam tastahji fasna' ma sji'ta – Meunjo gata hana lé urat malèë, peubuët ladju peuë njang galak teuh.


Uléh sababnjan, generasi muda ukeuë njoë, kader2 njang akan sambông perdjuangan sutji njoë musti tapeubeukai deungon iëleumèë njang meumada, deungon ideologi njang kong, deungon moral njang islami dan budi pekerti njang djroh. Deungon lagèë njan, geutanjoë akan bagah trôk bak tudjuan, Insja Allah. Meunjo generasi djinoë hana ôsaha untôk peubutôi atra njoë, maka generasi ukeuë akan geuteurimong waresan njang djuôh leubèh brôk lom.


Wabillahit Taufiq Walhidaajah wassalamu'alaikum wr.wb.