Meuluëm

Haba lam padum minggu di kawasan Irupa njoë njang meugah salah sabohdjih nakeuh teuntang tjuë seulingong (sadap) talipun djaroë gop.  Njang ditju pih kon sibarang kasoë ureuëng meutapi ulèë peumeurintah lagèë Peurdana Meuntroë atawa ladom tjit Presiden saboh neugara.  Haba njan meusambong lagèë badè teuka. 

Phôn meu-asai dari sidroë ahli komputer njang keuridja seubagoe agen CIA (Central Intelligence Agency) Edward Snowden njang geusurôt pijoh keuridja lam bideung intelidjèn Amerika.  Kon hanja geusurôt, lheuh njan geupeubutjho buët njang kalheuh dipeugot lawét keuridja sadjan CIA.  Salah saboh njang geuruah haba rahasia bak media Washington Post dan The Guardian bahwa sadjih katrép ka Amerika tjuë seulingong talipun djaroë rata peumimpén neugara di Irupa. 
Dalam katja mata peumeurintah Amerika, Edward Snowden na keuh sidroë peungkhianat teuma seubalékdjih bak peumeurintah neugara laén beukaih staf CIA njan seubago pahlawan.  Edward Snowden pajah tjok silop tubit u lua Amerika untôk mita suaka sabab meunjoë diteumeung lé algodjo Amerika, djeut takira mungkén akan dipeuhabéh atawa minimal di pasoë lam glap si umum hudép sabab peubutjho rahasia neugara Amerika lumbôi sa.

Tjuë seulingong njan seubeunadjih djeut meungantjam bahaja nasional sabôh-sabôh neugara.  Bahajadjih meunjoë rahasia politék internal lam saboh nanggroë diteupeuë lé gop maka akan djeut di sabotase (peureulhoh).  Seulaén nibak njan, peuneutôh politék (policy) akan keumah diato lé Amerika.  Ureuëng ramé njang dukong gaja hudép bibeuh that gram.  Mahasiswa tron bak djalan demonstrasi geutulak keubidjakan National Security Agency (NSA) bak September 2013 likôt.  Bak papeun meutuléh ”Thank You Snowden” dan ”Snowden is A Hero”.

Lagèë haba buno diateuh beurita teuntang tjuë seulingong talipun lagèë badé teuka na efek karap ban sigom donja.  Lam kawasan Asia rupadjih Australia peurséh saboh lumbôi lagèë rakandjih Amerika.  Teuka haba keuneulheuh bahwa National Security Agency (NSA) Amerika na keuridja sama deungon Direktorat Intelidjèn Australia (ASIO).  Njan haba meusumber dari narit dari Edward Snowden keudroë njang tugaih Australia geuluëm informasi di neugara-neugara Asia Pasifik.  Target utama keuridja sama bandua badan intelidjèn njan na keuh didjak séntèë Satelit Palapa ata Indonesia njang na lajanan talipun djaroë dan komunikasi radio di kawasan Asia Pasifik, teumasôk Indonesia, Thailand, Filipina, Malaysia, Brunei, dan Papua Nugini. 

Paneukdjih, meunjoë keumah di tjue seulingong (sadap) alat komunikasi njan maka informasi rahasia di neugara-neugara Asia Pasifik njan na bak djaroë Amerika dan Australia.  Keuridja sama njan dipeudjak dari Embassy Amerika dan Embassy Australia di Djakarta.   Haba njan trok dari Profesor Des Ball watèë meuhaba deungon Australian Broadcasting Corporation  dan media laén geupot narit njan seubago beurita njang paléng barô.   Supaja meuhasé buët njan, peutrang Profesor Des Ball, Australia na peut boh fasilitas super tjanggih dan njan roh lam program X-Keyscore--sabôh sistém komputer ata NSA seubagoe fungsi analisa karap bandum aktivitas internet teumasôk email, saweu laman web dan media sosial. 


Kheun Profesor njan lom, peut boh fasilitas spionase njan keumah diluëm komunikasi sipil dan milité di kawasan Asia Pasifik sampo wilajah Samudra Hindia.  Watèë media laké konfirmasi peukara narit Profesor Des Ball dari Defense and Strategic Studies Center, Australian National University, djuru haba bak embassy Australia di Djakarta Ray Marcello, hana haba sapeuë sira geutham bhaih peukara operasi intelidjèn.  ”Embassy Australia handjeut bri komentar sapeuë teuntang njan,” kheun Ray Marcello, Rabu (30/10).